“აქ, ამ სამყაროში” (ინტერვიუები)

პირველი ინტერვიუს გამოქვეყნებიდან დღემდე თითქმის 20 წელია გასული და დღესაც ისეთივე ინტერესით იკითხება, როგორითაც პირველად გაცნობისას. კიდევ გავა 20 წელი და მათდამი ინტერესი კიდევ უფრო გაიზრდება. 

 ეს წიგნი არ არის მხოლოდ მათთვის, ვინც კულტურით და ხელოვნებით არის დაინტერესებული. ეს წიგნი ისტორიკოსებისა და სოციოლოგებისთვისაც ძალიან საინტერესოა, რადგან მისი გმირები ქმნიან ეპოქის უტყუარ, შეულამაზებელ სურათს.

ამ წიგნით გაიგებთ, რას ფიქრობდა აკა მორჩილაძე, როცა ჯერ არ ჰქონდა დაწერილი „სანტა ესპერანსა“, „ძველი გულებისა და ხმლისა“, „Obole“ და სხვა; როგორ გაჩნდა გრაფი სეგედი ჭაბუა ამირეჯიბის შემოქმედებაში; როგორ გახადა გია ყანჩელმა სიჩუმე ხელშესახები მუსიკალურ ნაწარმოებში.
 “ბიძინა კვერნაძე, გურამ დოჩანაშვილი, ჟანრი ლოლაშვილი, ბესიკ ხარანაული, ჭაბუა ამირეჯიბი, აკა მორჩილაძე, თამაზ ჩხენკელი, პიკო ნიჟარაძე, რეზო ჭეიშვილი, ლაშა თაბუკაშვილი, ჯაბა იოსელიანი, რობერტ სტურუა, ტარიელ ჭანტურია, ანზორ ერქომაიშვილი, ჯიბსონ ხუნდაძე, რეზო ესაძე, გია ყანჩელი, ოთარ ჭილაძე, ლილი იოსელიანი, გოგი ალექსი-მესხიშვილი, თემურ ჩხეიძე და ელდარ შენგელაია – ეს ადამიანები ქმნიან ეპოქის უტყუარ, შეულამაზებელ სურათს და ამიტომ, ეს ინტერვიუები არ კარგავენ აქტუალობას. პირიქით, დრო კიდევ უფრო ძვირფასს ხდის ამ მატიანეს.”

 ეს გულახდილობა მთლიანად ქეთევან სადღობელაშვილის დამსახურებაა. ძალიან ცოტას თუ შეუძლია, რესპონდენტი დაიმეგობროს. ეს არ არის კითხვა-პასუხი, ეს ორი ადამიანის საუბარია მათთვის საინტერესო თემაზე და ისეა მოწოდებული, რომ ყველასთვის საინტერესო გახდეს. ამ მხრივ, ეს წიგნი აუცილებელი საკითხავია მომავალი ჟურნალისტებისთვის. განსაკუთრებით მათთვის, ვისაც ინტერვიუ იმ წინადადებების ერთობლიობა ჰგონია, რომლებიც კითხვის ნიშნით მთავრდება.